ನ.8-ಡಿ.7: ಬೃಹತ್ ಗೀತೋತ್ಸವ

ಲೋಕಬಂಧು ನ್ಯೂಸ್, ಉಡುಪಿ

ಪರ್ಯಾಯ ಪುತ್ತಿಗೆ ಶ್ರೀಕೃಷ್ಣ ಮಠ ಆಶ್ರಯದಲ್ಲಿ ನಡೆಯುತ್ತಿರುವ ವಿಶ್ವ ಗೀತಾ ಪರ್ಯಾಯ ಅಂಗವಾಗಿ ನವೆಂಬರ್ 8ರಿಂದ ಡಿಸೆಂಬರ್ 7ರ ವರೆಗೆ ಒಂದು ತಿಂಗಳ ಪರ್ಯಂತ ಬೃಹತ್ ಗೀತೋತ್ಸವ ನಡೆಯಲಿದೆ ಎಂದು ಪರ್ಯಾಯ ಪುತ್ತಿಗೆ ಮಠಾಧೀಶ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ತಿಳಿಸಿದರು.

ಗುರುವಾರ ಸುದ್ದಿಗೋಷ್ಟಿಯಲ್ಲಿ ಕಾರ್ಯಕ್ರಮದ ಮಾಹಿತಿ ನೀಡಿದ ಅವರು, ನ.8ರಂದು ಸಂಜೆ 4 ಗಂಟೆಗೆ ಪೇಜಾವರ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದರು ಕಾರ್ಯಕ್ರಮ ಉದ್ಘಾಟಿಸುವರು. ಜೊತೆಗೆ ಕನಕ  ಜಯಂತಿಗೂ ಚಾಲನೆ ನೀಡಲಾಗುವುದು.

ಅಂದು ಬೆಳಿಗ್ಗೆ 6.30ರಿಂದ ಗೀತಾ ಹೋಮ, 7ರಿಂದ ಸಹಸ್ರ ಕಂಠ ಮಧ್ವ ವಿಜಯ ಪಾರಾಯಣ, ಅಪರಾಹ್ನ 3.30ರಿಂದ ಸಹಸ್ರ ಕಂಠ ಲಕ್ಷ್ಮೀ ಶೋಭಾನೆ ಪಾರಾಯಣ, 4.30ರಿಂದ ಗೀತಾ ಮೆರವಣಿಗೆ ನಡೆಯಲಿದೆ.

ನ.9ರಂದು ಪಲಿಮಾರು ಮಠಾಧೀಶರಾಗಿದ್ದ ಶ್ರೀ ವಿದ್ಯಾಮಾನ್ಯತೀರ್ಥ ಶ್ರೀಪಾದರ ಪೀಠಾರೋಹಣ ಶತಮಾನೋತ್ಸವ ಸೇರಿದಂತೆ ಪ್ರತಿದಿನ ವಿವಿಧ ಕಾರ್ಯಕ್ರಮಗಳು ನಡೆಯಲಿದ್ದು, ವಿವಿಧ ಮಠಾಧೀಶರು ಆಗಮಿಸುವರು. ಸಂತ ಸಮ್ಮೇಳನ, ಗೀತಾ ಪ್ರವಚನ, ಗೀತಾ ಮಹಾಯಾಗ, ನ.21ರಂದು ಶ್ರೀನಿವಾಸ ಕಲ್ಯಾಣ, ಪುತ್ತಿಗೆ ವಿದ್ಯಾಪೀಠದ ಘಟಿಕೋತ್ಸವ ಇತ್ಯಾದಿ ಕಾರ್ಯಕ್ರಮ ನಡೆಯಲಿದೆ ಎಂದು ವಿವರಿಸಿದರು.

ಪ್ರಧಾನಿ ಭೇಟಿ

ನ.28ರಂದು ಪ್ರಧಾನಿ ನರೇಂದ್ರ ಮೋದಿ ಆಗಮಿಸಲಿದ್ದು, ಲಕ್ಷ ಕಂಠ ಗೀತಾ ಪಾರಾಯಣದಲ್ಲಿ ಭಾಗವಹಿಸುವರು. ಭಗವದ್ಗೀತೆ, ವಿಶ್ವ ಗೀತೆಯಾದಾಗ ಭಾರತ ವಿಶ್ವಗುರು ಆಗಬಲ್ಲುದು ಎಂಬ ಆಶಯದಿಂದ ಗೀತೆಯ ಬಗ್ಗೆ ಅತೀವ ಅಭಿಮಾನ ಹೊಂದಿರುವ ಪ್ರಧಾನಿ ಮೋದಿ, ಅಂದು ಮಧ್ಯಾಹ್ನ 12 ಗಂಟೆಗೆ ಮಠಕ್ಕೆ ಆಗಮಿಸಿ ಶ್ರೀಕೃಷ್ಣ- ಮುಖ್ಯಪ್ರಾಣ ದರ್ಶನದ ಬಳಿಕ ಸುಮಾರು 1.50 ಕೋ.ರೂ. ವೆಚ್ಚದಲ್ಲಿ ನಿರ್ಮಿಸಲಾದ 'ಸುವರ್ಣ ಮುಖಮಂಟಪ' ಹಾಗೂ ಮಾಜಿ ಸಚಿವ ಪ್ರಮೋದ್ ಮಧ್ವರಾಜ್ ಸೇವಾರ್ಥ ನಿರ್ಮಿಸಲಾದ `ಕನಕನ ಕಿಂಡಿಗೆ ಕನಕದ ಕವಚ' ಉದ್ಘಾಟಿಸಿ, ಗೀತಾ ಮಂದಿರದಲ್ಲಿ ಶ್ರೀಕೃಷ್ಣ ಭೋಜನ ಪ್ರಸಾದ ಸ್ವೀಕರಿಸಿದ ಬಳಿಕ ಪಾರ್ಕಿಂಗ್ ಪ್ರದೇಶದ ಬಳಿ ನಡೆಯುವ ಲಕ್ಷ ಕಂಠ ಗೀತಾ ಪಾರಾಯಣದಲ್ಲಿ ಭಾಗಿಯಾಗುವರು. ಭಗವದ್ಗೀತೆಯ ಒಂದೆರಡು ಶ್ಲೋಕಗಳನ್ನು ಸ್ವತಃ ಪಠಿಸುವ ಮೋದಿ, ಬಳಿಕ ಶ್ರೀಕೃಷ್ಣಾರ್ಪಣಗೊಳಿಸಲಾಗುವುದು.

ಕರ್ನಾಟಕ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್, ಕೇಂದ್ರ ಸಚಿವರಾದ ಪ್ರಹ್ಲಾದ ಜೋಷಿ ಮತ್ತು ನಿರ್ಮಲಾ ಸೀತಾರಾಮನ್, ರಾಜ್ಯ ಗೃಹಸಚಿವ ಡಾ.ಜಿ.ಪರಮೇಶ್ವರ ಸಹಿತ  ಗಣ್ಯರು ಭಾಗವಹಿಸುವರು. 

ಮಧ್ಯಾಹ್ನ 1.30ಕ್ಕೆ ಪ್ರಧಾನಿ ಮೋದಿ ಮಠದಿಂದ ನಿರ್ಗಮಿಸುವರು ಎಂದು ಶ್ರೀಗಳು ವಿವರಿಸಿದರು.

ಪುತ್ತಿಗೆ ಕಿರಿಯ ಶ್ರೀ ಸುಶ್ರೀಂದ್ರತೀರ್ಥ ಶ್ರೀಪಾದರು ಸಾನ್ನಿಧ್ಯ ವಹಿಸಿದ್ದರು.

ಮಠದ ದಿವಾನ ನಾಗರಾಜ ಆಚಾರ್ಯ ಮತ್ತು ಕಾರ್ಯದರ್ಶಿ ಪ್ರಸನ್ನ ಆಚಾರ್ಯ ಇದ್ದರು.

ಕಾರ್ಯಕ್ರಮ ವೈವಿಧ್ಯ

ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರ ಚತುರ್ಥ ಪರ್ಯಾಯದ ಸಮಾಪನ ಅಂಗವಾಗಿ ಡಿ.13ರಿಂದ ಜ.17ರ ವರೆಗೆ ವಿವಿಧ ಕಾರ್ಯಕ್ರಮ ನಡೆಯಲಿದೆ.

ಡಿ.13- ವಿಶ್ವಶಾಂತಿ ಸಮ್ಮೇಳನ, ಡಿ.27- ಪಾರ್ಥಸಾರಥಿ ಸ್ವರ್ಣ ರಥ ಸಮರ್ಪಣೆ ಮತ್ತು ಭಗವದ್ಗೀತಾ ಸುವರ್ಣ ಪುಸ್ತಕ ಸಮರ್ಪಣೋತ್ಸವ, ಜ.8- ಪರ್ಯಾಯ ಮಂಗಳೋತ್ಸವ ಆರಂಭ, ಜ.9ರಿಂದ 15- ಸಪ್ತೋತ್ಸವ ಆರಂಭ, ಜ.10- ಪುತ್ತಿಗೆ ಸುಗುಣ ಶಾಲಾ ವಾರ್ಷಿಕೋತ್ಸವ, ಜ.11- ಸುಗುಣಮಾಲಾ ಪತ್ರಿಕೆಯ 40ನೇ ವಾರ್ಷಿಕೋತ್ಸವ, ಜ.17- ಪರ್ಯಾಯ ಸಮಾರೋಪ ಸಮಾರಂಭ ನಡೆಯಲಿದೆ.