ಪೆರ್ಣಂಕಿಲ: ಪೇಜಾವರಶ್ರೀ ದಿಗ್ವಿಜಯೋತ್ಸವ, ಧ್ವಜಸ್ತಂಭ ತೈಲಾಧಿವಾಸ

ಲೋಕಬಂಧು ವಾರ್ತೆ

ಉಡುಪಿ, ಅ.4: ಪೇಜಾವರ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದರು 36ನೇ ಚಾತುರ್ಮಾಸ್ಯ ವ್ರತವನ್ನು ಮೈಸೂರಿನ ಕೃಷ್ಣಧಾಮದಲ್ಲಿ ಪೂರೈಸಿ, ದಿಗ್ವಿಜಯೋತ್ಸವದ ಮೂಲಕ ಪೆರ್ಣಂಕಿಲ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ಕ್ಷೇತ್ರಕ್ಕೆ ಸೋಮವಾರ ಚಿತ್ತೈಸಿದರು.

ಶ್ರೀಗಳನ್ನು ಪೆರ್ಣಂಕಿಲ ಜೋಡುಕಟ್ಟೆ ಬಳಿಯಿಂದ ಮಂಗಳವಾದ್ಯ, ಚೆಂಡೆ ನಾದ, ಭಜನಾ ತಂಡಗಳು, ವೇದಘೋಷದ ಮೂಲಕ ಮೆರವಣಿಗೆಯಲ್ಲಿ ಶ್ರೀಕ್ಷೇತ್ರಕ್ಕೆ ಬರಮಾಡಿಕೊಳ್ಳಲಾಯಿತು.

ಶ್ರೀಗಳು ಕ್ಷೇತ್ರದ ದೇವರ ದರ್ಶನ ಮಾಡಿ, ಆರತಿ ಬೆಳಗಿದರು.

ಸಮಗ್ರ ಜೀರ್ಣೋದ್ಧಾರದ ಭಾಗವಾಗಿ ನೂತನ‌ ಧ್ವಜಸ್ಥಂಭ (ಕೊಡಿಮರ)ವನ್ನು 3 ತಿಂಗಳು ಕೆಸರಿನಲ್ಲಿ ಹದಗೊಳಿಸಿದ್ದು, ಪೇಜಾವರ ಶ್ರೀಗಳ ಅಮೃತ ಹಸ್ತದಿಂದ ಪರಿಶುದ್ಧ ತಿಲ ತೈಲ ಸಮರ್ಪಿಸುವುದರೊಂದಿಗೆ ತೈಲಾಧಿವಾಸಕ್ಕೊಳಪಡಿಸಲಾಯಿತು.

ಭಕ್ತಾದಿಗಳು ಈ ಕಾರ್ಯದಲ್ಲಿ ಕೈಜೋಡಿಸಿ ತೈಲ ಸಮರ್ಪಿಸಿದರು.

ನೂತನವಾಗಿ ಪುನರ್ನಿರ್ಮಾಣ ಮಾಡುತ್ತಿರುವ ಪೇಜಾವರ ಮಠದ ಶಾಖೆಯ ಕಾಮಗಾರಿಯ ಪ್ರಗತಿಯನ್ನು ಶ್ರೀಗಳು ವೀಕ್ಷಿಸಿದರು. 

ಬಳಿಕ ನಡೆದ ಸಭಾ ಕಾರ್ಯಕ್ರಮ ಶ್ರೀವತ್ಸ ಭಟ್ ಮತ್ತು ಹರೀಶ ಸರಳಾಯ ವೇದ ಘೋಷದೊಂದಿಗೆ ಆರಂಭವಾಯಿತು. ಸಮಿತಿ ಅಧ್ಯಕ್ಷ ವಿದ್ವಾನ್ ಪೆರ್ಣಂಕಿಲ ಹರಿದಾಸ ಭಟ್ ಪ್ರಸ್ತಾವನೆಗೈದು, ಸ್ವಾಗತಿಸಿದರು

ಜೀರ್ಣೋದ್ಧಾರಕ್ಕೆ ಧನಸಹಾಯವಿತ್ತ ದಾನಿಗಳನ್ನು ಶ್ರೀಗಳು ಶಾಲು ಹೊದಿಸಿ ಫಲ ಮಂತ್ರಾಕ್ಷತೆ ನೀಡಿ ಗೌರವಿಸಿದರು.

ಭಕ್ತಜನರ ಆಶಯದಂತೆ ಶ್ರೀಗಳಿಗೆ ಸದ್ಗುರು ಫಲಾರ್ಪಣೆ ಕಾರ್ಯಕ್ರಮದಲ್ಲಿ ವಿವಿಧ ರೀತಿಯ ಫಲಗಳಿಂದ ಅರ್ಪಿಸಿ, ಆರತಿ ಬೆಳಗಿ ಗೌರವಿಸಲಾಯಿತು.

ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಕಾಪು ಶಾಸಕ ಗುರ್ಮೆ ಸುರೇಶ್ ಶೆಟ್ಟಿ, ಉಡುಪಿ ಶಾಸಕ ಯಶಪಾಲ್ ಸುವರ್ಣ, ಉದ್ಯಮಿಗಳಾದ ಜಯಲಕ್ಷ್ಮೀ ಸಿಲ್ಕ್ ನ ವೀರೇಂದ್ರ ಹೆಗ್ಡೆ ದಂಪತಿ, ಸಾಯಿರಾಧಾ ಮನೋಹರ ಶೆಟ್ಟಿ, ಪೇಜಾವರ ಮಠದ ದೀವಾನ ರಘುರಾಮ ಆಚಾರ್ಯ, ಕಾರ್ಯನಿರ್ವಹಣಾಧಿಕಾರಿ ಸುಬ್ರಹ್ಮಣ್ಯ ಭಟ್, ವಾಸ್ತುತಜ್ಣ ಗುಂಡಿಬೈಲು ಸುಬ್ರಹ್ಮಣ್ಯ ಭಟ್ ಅವಧಾನಿ, ಕ್ಷೇತ್ರದ ತಂತ್ರಿ ಮಧುಸೂಧನ ತಂತ್ರಿ ಇದ್ದರು.

ಪ್ರಧಾನ ಕಾರ್ಯದರ್ಶಿ ಪೆರ್ಣಂಕಿಲ ಶ್ರೀಶ ನಾಯಕ್  ಸಂಯೋಜಿಸಿದರು. ಉಮೇಶ್ ನಾಯಕ್ ಪೆರ್ಣಂಕಿಲ ನಿರೂಪಿಸಿದರು.