ಜಗತ್ತಿನ ತಲ್ಲಣಗಳಿಗೆ ಗೀತೆಯಿಂದ ಪರಿಹಾರ

ಲೋಕಬಂಧು ನ್ಯೂಸ್, ಉಡುಪಿ

ಜಗತ್ತಿನ ಎಲ್ಲ ವಿಪ್ಲವಗಳು, ತಲ್ಲಣಗಳಿಗೆ ಭಗವದ್ಗೀತೆ ಪರಿಹಾರ ನೀಡಬಲ್ಲುದು ಎಂದು ಪರ್ಯಾಯ ಪುತ್ತಿಗೆ ಮಠಾಧೀಶ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ಹೇಳಿದರು.

ಪರ್ಯಾಯ ಪುತ್ತಿಗೆ ಮಠ ಆಶ್ರಯದಲ್ಲಿ ಕೃಷ್ಣ ಮಠ ರಾಜಾಂಗಣದಲ್ಲಿ ನಡೆಯುತ್ತಿರುವ ಬೃಹತ್ ಗೀತೋತ್ಸವದಲ್ಲಿ ಸೋಮವಾರ ಆಯೋಜಿಸಲಾದ ಸಂತ ಸಂದೇಶ ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿದರು.

ಕೃಷ್ಣನಂತೆ ಗೀತೆಯೂ ಆಕರ್ಷಕ. ಜಗತ್ತಿನಲ್ಲಿ ಅನೇಕ ತಲ್ಲಣಗಳಾಗುತ್ತಿವೆ. ಎಲ್ಲರ ಮನಸ್ಸು ಉದ್ವೇಗಕ್ಕೊಳಗಾಗುತ್ತಿದೆ. ನೆಮ್ಮದಿಯ ಬದುಕಿಗೆ ಮೊಬೈಲ್ ತೊಡಕಾಗಿದೆ.‌ ಈ ಅಶಾಂತಿಯ ನಿವಾರಣೆಗೆ ಏಕೈಕ ಮಾರ್ಗ ಭಗವದ್ಗೀತೆ ಎಂದು ಶ್ರೀಪಾದರು ಹೇಳಿದರು.

ಕುಟುಂಬ- ಕುಟುಂಬಗಳ‌ ನಡುವೆ‌‌ ಕದನ ಹೆಚ್ಚಾಗುತ್ತಿದೆ. ಮತೀಯ ದ್ವೇಷ, ಜಾತಿಗಳ ನಡುವೆ ಕಂದಕ ನಿರ್ಮಾಣವಾಗುತ್ತಿರುವ ಕಾರಣ ಕೋರ್ಟ್‌ಗಳಲ್ಲಿ ಕೇಸುಗಳ ಸಂಖ್ಯೆ ಜಾಸ್ತಿಯಾಗುತ್ತಿದೆ. ಈ ಎಲ್ಲಾ ಸಮಸ್ಯೆಗಳಿಗೆ ಭಗವದ್ಗೀತೆ ಮಾತ್ರ ಪರಿಹಾರ ಎಂದು ಶ್ರೀಪಾದರು ಅಭಿಪ್ರಾಯ ವ್ಯಕ್ತಪಡಿಸಿದರು.

ಕೃಷ್ಣ ದರ್ಶನ ಪೂರ್ಣವಾಗಲು ಗೀತಾ ದರ್ಶನ ಆಗಬೇಕು. ಹಾಗಾಗಿಯೇ ಈ ಬಾರಿಯ ನಮ್ಯ ಪರ್ಯಾಯ ವಿಶ್ವ ಗೀತಾ ಪರ್ಯಾಯ ಎಂದು ನಡೆಸಿ, ಗೀತೆಗೆ ಸಂಬಂಧಿಸಿ ಹಲವು ಚಟುವಟಿಕೆಗಳನ್ನು ನಡೆಸಿದ್ದೇವೆ ಎಂದು ಶ್ರೀ ಸುಗುಣೇಂದ್ರ ಶ್ರೀಪಾದರು ಹೇಳಿದರು.

ಕೋಟಿ ಗೀತಾ ಯಜ್ಞದಲ್ಲಿ ಭಾಗವಹಿಸಿದವರ ಅನುಭವಗಳು ಅದ್ಭುತವಾಗಿವೆ. ಗೀತೆ ಬರೆದ ಕಾರಣ ಭಕ್ತರ ಎಲ್ಲಾ ಸಂಕಲ್ಪಗಳು ಪೂರ್ಣಗೊಂಡಿವೆ. ಒಬ್ಬರು 108 ಬಾರಿ ಭಗವದ್ಗೀತೆ ಬರೆದಿದ್ದಾರೆ. ಅನೇಕ ಮಂದಿಯ ಆರೋಗ್ಯ ಸುಧಾರಿಸಿದೆ ಎಂದರು.

ಸಾನ್ನಿದ್ಯ ವಹಿಸಿದ್ದ ತುಮಕೂರು ಸಿದ್ದಗಂಗಾ ಮಠದ ಶ್ರೀ ಶಿವಸಿದ್ದೇಶ್ವರ ಸ್ವಾಮೀಜಿ ಆಶೀರ್ವಚನ ನೀಡಿ, ಧರ್ಮಗಳಲ್ಲಿ ಹೇಳಿರುವ  ತತ್ವಗಳನ್ನು ಮನನ ಮಾಡಿಕೊಂಡು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು.

ಬ್ರಹ್ಮಾಂಡದಲ್ಲಿರುವ 14 ಲಕ್ಷ ಜೀವರಾಶಿಗಳಲ್ಲಿ ಮಾನವ ಜನ್ಮವೇ ಶ್ರೇಷ್ಠ. ಶಾಸ್ತ್ರದ ಪ್ರಕಾರ ಎಲ್ಲಾ ಪಾಪಗಳು ಕಳೆದು ಹೋದ‌ ಬಳಿಕವೇ ಮಾನವ ಜನ್ಮ ಸಿಗುತ್ತದೆ. ಯಾವುದೋ ಜನ್ಮದ ಸುಕೃತದಿಂದಾಗಿಯೇ ನಮಗೆಲ್ಲಾ ಭರತ ಭೂಮಿಯಲ್ಲಿ ಜನ್ಮ ದೊರೆತಿದೆ ಎಂದರು.

ಭಗವದ್ಗೀತೆ ಕೇವಲ ಸಂಭಾಷಣೆ- ಪುಸ್ತಕ ಮಾತ್ರವಲ್ಲ. ಡಿವಿಜಿ ಹೇಳುವಂತೆ ಭಗವದ್ಗೀತೆ ಒಂದು ಜೀವನ ದಿಗ್ದರ್ಶನ. ವೇದ, ಉಪನಿಷತ್ತುಗಳ ಸಾಲಿಗೆ ಭಗವದ್ಗೀತೆಯೂ ಸೇರುತ್ತದೆ ಎಂದರು.

ಪುತ್ತಿಗೆ ಮಠದ ಕಿರಿಯ ಶ್ರೀ ಸುಶೀಂದ್ರತೀರ್ಥ ಶ್ರೀಪಾದರು ಸಾನ್ನಿಧ್ಯ ವಹಿಸಿದ್ದರು .

ಈ ಸಂದರ್ಭದಲ್ಲಿ ವಿದ್ವಾಂಸ ವೆಂಕಟೇಶ ಬಾಯಿರಿ ಅವರಿಗೆ ‌ಶ್ರೀಕೃಷ್ಣಗೀತಾನುಗ್ರಹ ಪ್ರಶಸ್ತಿ ನೀಡಲಾಯಿತು.

ಸಿದ್ಧಗಂಗಾ ಶ್ರೀಗಳನ್ನು ಪುತ್ತಿಗೆ ಮಠ ವತಿಯಿಂದ ಗೌರವಿಸಲಾಯಿತು.

ಶ್ರೀಮಠದ ದಿವಾನ ನಾಗರಾಜ ಆಚಾರ್ಯ, ಕಾರ್ಯದರ್ಶಿ ಪ್ರಸನ್ನಾಚಾರ್ಯ ಇದ್ದರು. ವಾದಿರಾಜ ಸಂಶೋಧನ ನಿರ್ದೇಶಕ ಡಾ.ಗೋಪಾಲಾಚಾರ್ ನಿರೂಪಿಸಿದರು.