ಕರ್ತವ್ಯ ಪ್ರಜ್ಞೆಯ ಕಾಯಕ ದೇವರ ಪೂಜೆ

ಲೋಕಬಂಧು ನ್ಯೂಸ್, ಉಡುಪಿ

ಧೂಪ ದೀಪ ನೈವೇದ್ಯ ಆರತಿ ಅರ್ಚನೆ ಮಾತ್ರ ದೇವರ ಪೂಜೆಯಲ್ಲ, ವ್ಯಕ್ತಿ ಪ್ರತಿನಿತ್ಯ ಮಾಡುವ ಕರ್ತವ್ಯಗಳೂ ದೇವರ ಪೂಜೆಗೆ ಸಮ ಎಂದು ಪರ್ಯಾಯ ಪುತ್ತಿಗೆ ಮಠಾಧೀಶ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ಅಭಿಪ್ರಾಯ ವ್ಯಕ್ತಪಡಿಸಿದರು.

ಪರ್ಯಾಯ ಪುತ್ತಿಗೆ ಮಠ ಆಶ್ರಯದಲ್ಲಿ ಕೃಷ್ಣ ಮಠ ರಾಜಾಂಗಣದಲ್ಲಿ ನಡೆಯುತ್ತಿರುವ ಬೃಹತ್ ಗೀತೋತ್ಸವದ ಸಂತ ಸಂದೇಶ ಕಾರ್ಯಕ್ರಮದಲ್ಲಿ ಭಾನುವಾರ ಆಶೀರ್ವಚನ ನೀಡಿದರು.

ಮನುಷ್ಯ ಮಾಡುವ ಯಾವುದೇ ಕೆಲಸಗಳನ್ನು ಶ್ರದ್ಧೆ ಮತ್ತು ಪ್ರಾಮಾಣಿಕವಾಗಿ ಕರ್ತವ್ಯ ಪ್ರಜ್ಞೆಯಿಂದ ಮಾಡಿದಾಗ ಅದು ಭಗವತ್ಪೂಜೆಯಾಗುತ್ತದೆ. ಅದು ಕೇವಲ ಪುರುಷರಿಗೆ ಮಾತ್ರ ಸೀಮಿತವಲ್ಲ,ಕುಟುಂಬ ನಿರ್ವಹಣೆಯ ಮಹಿಳೆಯರ ಕಾರ್ಯವೂ ದೇವಪೂಜೆಗೆ ಸಮನಾಗುತ್ತದೆ ಎಂದು ಶ್ರೀಪಾದರು ಹೇಳಿದರು.

ನಾವು ಸೇವಿಸುವುದನ್ನು  ಭಗವಂತನಿಗೆ ಸಮರ್ಪಿಸಬೇಕು. ಸಮರ್ಪಣೆಯಲ್ಲಿ ಕೃತಜ್ಞತಾಭಾವ ಇರಬೇಕು ಎಂದು ಶ್ರೀಗಳು ಪ್ರತಿಪಾದಿಸಿದರು.

ಕಾಫಿ- ಟೀ ನೈವೇದ್ಯ ಮಾಡಬಹುದೇ?

ನಾವು ಸೇವಿಸುವುದನ್ನು ದೇವರಿಗೆ ಸರ್ಪಿಸಬೇಕು ಎಂದಾಗ  ಕಾಫಿ- ಟೀ ದೇವರಿಗೆ ಸಮರ್ಪಿಸಬಹುದೇ ಎಂಬ ಜಿಜ್ಞಾಸೆ ಕೆಲವರಲ್ಲಿ ಮೂಡಬಹುದು. ಸೇವಿಸುವುದನ್ನು ಸಮರ್ಪಿಸಬಹುದು‌. ಆದರೆ, ಆರೋಗ್ಯಕ್ಕೆ ಪೂರಕವಾದುದನ್ನು ಮಾತ್ರ ಸೇವಿಸಬೇಕು, ಅಲ್ಲದ್ದನ್ನು ನಿಷೇಧಿಸಬೇಕು ಎಂದು ಶಾಸ್ತ್ರ ಹೇಳಿದೆ. ನಾವು ಸೇವಿಸುವ ಮಾತ್ರೆಗಳನ್ನು ಕೃತಜ್ಞತಾಭಾವದಿಂದ ಸಮರ್ಪಿಸಿ ಬಳಸುವುದು ತಪ್ಪಲ್ಲ ಎಂದು ಪುತ್ತಿಗೆ ಶ್ರೀಗಳು ಹೇಳಿದರು.

ಭಗವದ್ಗೀತೆ ಜೀವನಾದರ್ಶಗಳನ್ನು ತಿಳಿಸುವ ಗ್ರಂಥ. ಅದನ್ನು ಪ್ರತಿಯೊಬ್ಬರೂ ಮನನ ಮಾಡಬೇಕು. ಈ ನಿಟ್ಟಿನಲ್ಲಿ ನಮ್ಮ ಚತುರ್ಥ ಪರ್ಯಾಯದಲ್ಲಿ ಗೀತೆಗೆ ಪ್ರಾಶಸ್ತ್ಯ ನೀಡಿ, ಬಹುವಿಧ ಕಾರ್ಯಕ್ರಮಗಳನ್ನು ರೂಪಿಸಲಾಗುತ್ತಿದೆ ಎಂದರು.

ಚಿತ್ರಗೀತೆ ಗೊತ್ತು!

ನಮ್ಮ ಮಕ್ಕಳಿಗೆ ಚಿತ್ರಗೀತೆ ಗೊತ್ತು ಆದರೆ, ಭಗವದ್ಗೀತೆ ಗೊತ್ತಿಲ್ಲ. ಅನ್ಯ ಧರ್ಮೀಯರು ಬೈಬಲ್, ಕುರಾನ್ ಬಗ್ಗೆ ತಿಳಿವಳಿಕೆ ಹೊಂದಿದ್ದಾರೆ. ಆದರೆ, ಹಿಂದೂಗಳು ನಮ್ಮ ಧರ್ಮಗ್ರಂಥಗಳ ಪರಿಜ್ಞಾನದಲ್ಲಿ ಹಿಂದೆಬಿದ್ದಿದ್ದಾರೆ. ನಮ್ಮ ಮಕ್ಕಳಿಗೆ ಗೀತೆ, ಉಪನಿಷತ್, ರಾಮಾಯಣ- ಮಹಾಭಾರತ ಇತ್ಯಾದಿಗಳ ಬಗ್ಗೆ ಆಸಕ್ತಿ ಮೂಡಿಸುವ‌ ಕೆಲಸ ಮನೆಗಳಲ್ಲಿ ನಡೆಯಬೇಕು ಎಂದು ಪುತ್ತಿಗೆ ಶ್ರೀಗಳು ಸಲಹೆ ನೀಡಿದರು.

ಪರ್ಯಾಯ ಪುತ್ತಿಗೆ ಕಿರಿಯ ಶ್ರೀ ಸುಶ್ರೀಂದ್ರತೀರ್ಥ ಶ್ರೀಪಾದರು ಸಾನ್ನಿಧ್ಯ ವಹಿಸಿದ್ದರು.

ಸಾನ್ನಿಧ್ಯ ವಹಿಸಿದ್ದ ಪಡುಕುತ್ಯಾರು ಆನೆಗೊಂದಿ ಸಂಸ್ಥಾನ ಸರಸ್ವತೀ ಪೀಠದ ಶ್ರೀಕಾಳಹಸ್ತೇಂದ್ರ ಸರಸ್ವತೀ ಮಹಾಸ್ವಾಮೀಜಿ ಆಶೀರ್ವಚನ ನೀಡಿ, ಅವರವರ ಆಸಕ್ತಿಗನುಗುಣವಾಗಿ ಜ್ಞಾನ ಮಾರ್ಗ ಮತ್ತು ಭಕ್ತಿ ಮಾರ್ಗಗಳಲ್ಲಿ ಮುನ್ನಡೆಯಲು ಪ್ರತಿಯೊಬ್ಬರಿಗೂ ಅವಕಾಶ ಇದೆ. ಭಗವದರ್ಪಣ ಭಾವದಿಂದ ಮಾಡುವ ಎಲ್ಲ ಕೆಲಸ ಕಾರ್ಯಗಳೂ ಭಗವದೊಲುಮೆಗೆ ಪಾತ್ರವಾಗುತ್ತದೆ ಎಂದರು.

ಪುತ್ತಿಗೆಶ್ರೀ ಜ್ಞಾನಸೂರ್ಯ

ಜಗತ್ತಿಗೆ ಬೆಳಕು ನೀಡುವ ಸೂರ್ಯ ಪೂರ್ವದಲ್ಲಿ ಹುಟ್ಟಿ ಪಶ್ಚಿಮದಲ್ಲಿ ಅಸ್ತಮಿಸಿದರೆ, ಪುತ್ತಿಗೆ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ಪಶ್ಚಿಮದ ದೇಶಗಳಲ್ಲಿ ಜ್ಞಾನದಾಯಕ ಭಗವದ್ಗೀತೆಯ ಪ್ರಸಾರ ಕಾರ್ಯದಿಂದಾಗಿ ಜ್ಞಾನ ಸೂರ್ಯರಾಗಿದ್ದಾರೆ ಎಂದು ಬಣ್ಣಿಸಿದರು.

ವಿಶ್ಚಕರ್ಮ ಸಮಾಜದ ಪ್ರಮುಖರಾದ ಎಸ್.ಕೆ.ಎಫ್. ರಾಮಕೃಷ್ಣ ಆಚಾರ್ಯ ಮೂಡುಬಿದಿರೆ, ಸಂಧ್ಯಾ ಲಕ್ಷ್ಮಣ ಆಚಾರ್ಯ, ಮಧು ಆಚಾರ್ಯ ಮೂಲ್ಕಿ, ಶ್ರೀಧರ ಆಚಾರ್ಯ ವಡೇರಹೋಬಳಿ, ರಥಶಿಲ್ಪಿ ಲಕ್ಷ್ಮೀನಾರಾಯಣ ಆಚಾರ್ಯ ಕೋಟೇಶ್ವರ, ಅಲೆವೂರು ಯೋಗೀಶ ಆಚಾರ್ಯ ಮತ್ತು ಉಪೇಂದ್ರ ಆಚಾರ್ಯ ಉಪಸ್ಥಿತರಿದ್ದರು.

ಚಿತ್ತರಂಜನ್ ಶೆಟ್ಟಿ ಅವರಿಗೆ ಶ್ರೀಕೃಷ್ಣಗೀತಾನುಗ್ರಹ ಪ್ರಶಸ್ತಿ ನೀಡಲಾಯಿತು.

ಶ್ರೀಮಠದ ದಿವಾನ ನಾಗರಾಜ ಆಚಾರ್ಯ, ಕಾರ್ಯದರ್ಶಿ ಪ್ರಸನ್ನಾಚಾರ್ಯ, ಶ್ರೀಗಳ ಆಪ್ತ ಕಾರ್ಯದರ್ಶಿ ರತೀಶ ತಂತ್ರಿ, ಕಾರ್ಯದರ್ಶಿಗಳಾದ ರಮೇಶ ಭಟ್ ಮತ್ತು ರವೀಂದ್ರ ಆಚಾರ್ಯ ಸಹಕರಿಸಿದರು. ಕೆ.ವಿ.ರಮಣ್ ನಿರೂಪಿಸಿದರು.