ಲಕ್ಷ ಕಂಠ ಗೀತಾ ಪಾರಾಯಣಕ್ಕೆ ಕ್ಷಣಗಣನೆ

ಲೋಕಬಂಧು ನ್ಯೂಸ್, ಉಡುಪಿ

ವಿಶ್ವ ಪರ್ಯಾಯ ಖ್ಯಾತಿಯ ಪರ್ಯಾಯ ಪುತ್ತಿಗೆ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರ ಚತುರ್ಥ ಪರ್ಯಾಯ ಸಂದರ್ಭದಲ್ಲಿ ಹಮ್ಮಿಕೊಂಡಿರುವ ಬೃಹತ್ ಗೀತೋತ್ಸವ ಪ್ರಯುಕ್ತ ಶುಕ್ರವಾರ (ನ.28) ನಡೆಯುವ ಲಕ್ಷ ಕಂಠ ಗೀತಾ ಪಾರಾಯಣ ಕಾರ್ಯಕ್ರಮಕ್ಕೆ ಕ್ಷಣ ಗಣನೆ ಆರಂಭವಾಗಿದ್ದು, ಪ್ರಧಾನಿ ನರೇಂದ್ರ ಮೋದಿ ಆಗಮಿಸುತ್ತಿರುವುದು ವಿಶೇಷ ಆಕರ್ಷಣೆ ಮತ್ತು ಜನತೆಯಲ್ಲಿ ಪುಳಕ ಮೂಡಿಸಿದೆ. ಪ್ರಧಾನಿ ಭೇಟಿ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ಮತ್ತು ವಿಶೇಷ ರಕ್ಷಣಾ ತಂಡ (ಎಸ್.ಪಿ.ಜಿ) ಅಗತ್ಯ ಭದ್ರತೆ ಕೈಗೊಂಡಿದೆ. ಸುಮಾರು 3 ಸಾವಿರ ಮಂದಿ ಪೊಲೀಸರನ್ನು ನಿಯೋಜಿಸಲಾಗಿದೆ. ಕೃಷ್ಣಮಠದ ಸುತ್ತಲೂ ಪೊಲೀಸರ ಸರ್ಪಗಾವಲು ಇದೆ.

40 ನಿಮಿಷ ಮುನ್ನ ಆಗಮನ

ಪ್ರಧಾನಿ ಮೋದಿ ನಿಗದಿತ ಅವಧಿಗಿಂತ 40 ನಿಮಿಷ ಮೊದಲೇ ಆಗಮಿಸಲಿದ್ದು, ದೆಹಲಿಯಿಂದ ವಿಶೇಷ ವಿಮಾನದಲ್ಲಿ ಮಂಗಳೂರಿಗೆ ಆಗಮಿಸುವ ಅವರು ಉಡುಪಿಗೆ ಹೆಲಿಕಾಪ್ಟರ್ ಮೂಲಕ ಆಗಮಿಸುವರು. ಬೆಳಿಗ್ಗೆ 11 ಗಂಟೆಗೆ ಆದಿವುಡುಪಿ ಹೆಲಿಪ್ಯಾಡ್'ಗೆ ಬಂದಿಳಿದು, ಅಲ್ಲಿಂದ ಕೃಷ್ಣ ಮಠಕ್ಕೆ ರಸ್ತೆ ಮಾರ್ಗದಲ್ಲಿ ಆಗಮಿಸುವರು.

ರೋಡ್ ಶೋ

ಆದಿವುಡುಪಿಯಿಂದ ಕೃಷ್ಣಮಠಕ್ಕೆ ಆಗಮಿಸುವ ವೇಳೆ ಬನ್ನಂಜೆ ಡಾ.ವಿ.ಎಸ್. ಆಚಾರ್ಯ ಬಸ್ ನಿಲ್ದಾಣ ಬಳಿಯ ನಾರಾಯಣ ಗುರು ವೃತ್ತದಿಂದ ಕಲ್ಸಂಕ ವೃತ್ತದ ವರೆಗೆ ರೋಡ್ ಶೋ ನಡೆಯಲಿದ್ದು, ಆ ಮಾರ್ಗದ ಮೂರು ಕಡೆಗಳಲ್ಲಿ ಕರಾವಳಿಯ ಜಾನಪದ ಕಲೆಗಳಾದ ಯಕ್ಷಗಾನ, ಹುಲಿವೇಷ ಇತ್ಯಾದಿಗಳ ಪ್ರದರ್ಶನಕ್ಕೆ ಅವಕಾಶ ನೀಡಲಾಗಿದೆ.

ಕನಕ- ಕೃಷ್ಣ ದರ್ಶನ

ಬೆಳಿಗ್ಗೆ 11.20ರ ವೇಳೆಗೆ ಕೃಷ್ಣಮಠಕ್ಕೆ ಆಗಮಿಸುವ ಪ್ರಧಾನಿ ಮೋದಿ ರಥಬೀದಿಯಲ್ಲಿರುವ ಕನಕನ ಗುಡಿಗೆ ಭೇಟಿ ನೀಡಿ ಕನಕದಾಸರ ವಿಗ್ರಹಕ್ಕೆ ಪುಷ್ಪಾರ್ಚನೆ ಮಾಡುವರು. ಬಳಿಕ ಭಕ್ತರೋರ್ವರು ಸಮರ್ಪಿಸಿದ ಕನಕನ ಕಿಂಡಿಗೆ ಕನಕದ ಕವಚ ಉದ್ಘಾಟಿಸಿ, ಮಧ್ವ ಸರೋವರದಲ್ಲಿ ಪಾದ ಪಕ್ಷಾಲನೆಗೈದು ಕೃಷ್ಣ ದರ್ಶನ ಮಾಡುವರು.

ಇದೇ ಸಂದರ್ಭದಲ್ಲಿ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರ ಸನ್ಯಾಸಾಶ್ರಮ ಸುವರ್ಣ ಮಹೋತ್ಸವ ಸ್ಮರಣಾರ್ಥ 2 ಕೋ. ರೂ. ವೆಚ್ಚದಲ್ಲಿ ನಿರ್ಮಿಸಲಾದ ಸುವರ್ಣ ತೀರ್ಥ ಮಂಟಪ ಉದ್ಘಾಟಿಸಿ, ಶ್ರೀಕೃಷ್ಣನ ಆಭರಣಗಳು, ಚಿನ್ನದ ಪಲ್ಲಕಿ ಇತ್ಯಾದಿ ವೀಕ್ಷಿಸಿ, ಗೀತಾ ಮಂದಿರಕ್ಕೆ ತೆರಳುವರು.

ವೇದಘೋಷ, ಸೂರ್ಯವಾದ್ಯ ಸಹಿತ ಜಾನಪದ ವಾದನಗಳಿಂದ ಪ್ರಧಾನಿಗೆ ಮಠೀಯ ಗೌರವ ನೀಡಲಾಗುವುದು.

ಗೀತಾ ಮಂದಿರ ವೀಕ್ಷಿಸಿ, ಲಘು ಉಪಾಹಾರದ ಬಳಿಕ ಪ್ರಧಾನ ವೇದಿಕೆಗೆ ಆಗಮಿಸುವರು. ಗೀತೆಯ 15ನೇ ಶ್ಲೋಕ ಪಠಿಸುವ ಮೂಲಕ ಲಕ್ಷ ಕಂಠ ಗೀತಾ ಪಾರಾಯಣದಲ್ಲಿ ಭಾಗವಹಿಸುವರು. ಈ ಸಂದರ್ಭದಲ್ಲಿ ಗೀತಾ ಲೇಖನ ಯಜ್ಞ ದೀಕ್ಷೆ ಸ್ವೀಕರಿಸುವರು ಎಂದು ಪರ್ಯಾಯ ಪುತ್ತಿಗೆ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ತಿಳಿಸಿದ್ದಾರೆ.

ಮಧ್ಯಾಹ್ನ 1 ಗಂಟೆಗೆ ಪ್ರಧಾನಿ ಉಡುಪಿಯಿಂದ ನಿರ್ಗಮಿಸಿ, ಗೋವಾ ಪರ್ತಗಾಳಿ ಮಠದ ಕಾರ್ಯಕ್ರಮಕ್ಕೆ ತೆರಳುವರು.

ಪ್ರಧಾನಿ ಮೋದಿ ಭೇಟಿ ಹಿನ್ನೆಲೆಯಲ್ಲಿ ಶುಕ್ರವಾರ ಬೆಳಿಗ್ಗೆ 8ರಿಂದ ಅಪರಾಹ್ನ 3 ಗಂಟೆ ವರೆಗೆ ಭಕ್ತರಿಗೆ ಕೃಷ್ಣಮಠ ಪ್ರವೇಶ ಮತ್ತು ದೇವರ ದರ್ಶನ ನಿರ್ಬಂಧಿಸಲಾಗಿದೆ. ಮಠವನ್ನು ಸಿಂಗರಿಸಲಾಗಿದೆ.

ಉಡುಪಿ ನಗರ ಸಿಂಗಾರಗೊಂಡಿದೆ. ವಾಹನ ಪ್ರವೇಶ, ನಿಲುಗಡೆಗೆ ಸ್ಥಳ ಸೂಚಿಸಿ ಜಿಲ್ಲಾಧಿಕಾರಿ ಆದೇಶ ಹೊರಡಿಸಿದ್ದಾರೆ.