ಸದೃಢ ನವಭಾರತ ನಿರ್ಮಾಣಕ್ಕೆ ಗೀತೆ ಸೋಪಾನ

ಲೋಕಬಂಧು ನ್ಯೂಸ್, ಉಡುಪಿ

ಭಗವದ್ಗೀತೆ ಕೇವಲ ಗ್ರಂಥವಲ್ಲ, ಅದೊಂದು ರಾಷ್ಟ್ರ ನೀತಿ ರೂಪಿಸಬಲ್ಲ ಅದ್ಭುತ ಶಕ್ತಿ. ಸದೃಢ ಭಾರತ ನಿರ್ಮಾಣಕ್ಕೆ ಶ್ರೀಕೃಷ್ಣ ಬೋಧಿತ ಭಗವದ್ಗೀತೆಯೇ ಪ್ರೇರಣೆ ಎಂದು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಹೇಳಿದರು.

ಪರ್ಯಾಯ ಪುತ್ತಿಗೆ ಮಠ ಆಶ್ರಯದಲ್ಲಿ ಇಲ್ಲಿನ ಶ್ರೀಕೃಷ್ಣ ಮಠದಲ್ಲಿ ನಡೆಯುತ್ತಿರುವ ಬೃಹತ್ ಗೀತೋತ್ಸವ ಅಂಗವಾಗಿ ಶುಕ್ರವಾರ ಆಯೋಜಿಸಲಾದ ಲಕ್ಷಕಂಠ ಗೀತಾ ಪಾರಾಯಣದಲ್ಲಿ ಭಾಗವಹಿಸಿ ಮಾತನಾಡಿದರು.

ಶ್ರೀಕೃಷ್ಣ ಗೀತೆಯ ಮೂಲಕ ಸಮಾಜಕ್ಕೆ ಕರ್ಮ, ಕರ್ತವ್ಯ ಮತ್ತು ಕಲ್ಯಾಣದ ಸಂದೇಶ ನೀಡಿದ್ದು, ವಸುಧೈವ ಕುಟುಂಬಕಮ್ ಆಧಾರದಲ್ಲಿ ಕೇಂದ್ರ ಸರ್ಕಾರ ಸಬ್ ಕಾ ಸಾಥ್ ಸಬ್ ಕಾ ವಿಕಾಸ್ ಆಶಯದಲ್ಲಿ ವಿವಿಧ ಜನ ಕಲ್ಯಾಣ ಯೋಜನೆಗಳನ್ನು ರೂಪಿಸಿದೆ. ಆತ್ಮನಿರ್ಭರ, ನಾರಿ ಸುರಕ್ಷಾ, ಆಯುಷ್ಮಾನ್ ಮೊದಲಾದ ಯೋಜನೆಗಳನ್ನು ರೂಪಿಸಿದೆ ಎಂದರು.

ನಿರ್ದಾಕ್ಷಿಣ್ಯ ಕ್ರಮ

ಶ್ರೀಕೃಷ್ಣ ಯುದ್ಧ ಭೂಮಿಯಲ್ಲಿ ಗೀತೆಯನ್ನು ಬೋಧಿಸಿದ್ದು, ನವ ಭಾರತ ನಿರ್ಮಾಣದ ವೇಳೆ ಶಾಂತಿ ಬಯಸುವ ಜೊತೆಗೆ ಅಶಾಂತಿ ಮೂಡಿಸುವವರ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ಆಪರೇಶನ್ ಸಿಂಧೂರ ಕಾರ್ಯಾಚರಣೆಯನ್ನು ಉದಾಹರಿಸಿದರು.

ಆನಂದಾನುಭೂತಿ

ಉಡುಪಿ ಹಾಗೂ ತನ್ನ ಜನ್ಮಭೂಮಿ ಗುಜರಾತ್‌ಗೆ ಅವಿನಾಭಾವ ಸಂಬಂಧವಿದ್ದು, ದ್ವಾರಕೆಯಲ್ಲಿ ರುಕ್ಮಿಣಿಯಿಂದ ಪೂಜೆಗೊಳ್ಳುತ್ತಿದ್ದ ಕೃಷ್ಣನ ವಿಗ್ರಹ ಆಚಾರ್ಯ ಮಧ್ವರ ಮೂಲಕ ಉಡುಪಿಯಲ್ಲಿ ಸ್ಥಾಪನೆಗೊಂಡಿತು. ಆಚಾರ್ಯ ಮಧ್ವರು ದ್ವೈತ ಮತ ಸ್ಥಾಪನೆ ಮೂಲಕ ಜ್ಞಾನಸಾಮ್ರಾಜ್ಯ ವಿಸ್ತರಿಸಿದ್ದು ಜ್ಞಾನ, ಭಕ್ತಿ, ಅಧ್ಯಾತ್ಮ ಕಾರ್ಯದೊಂದಿಗೆ ಅನ್ನದಾನ, ಸಾಮಾಜಿಕ ಕಾರ್ಯಗಳಿಗೂ ಹೆಸರಾಗಿದೆ. ಅಂಥ ಸ್ಥಳಕ್ಕೆ ಆಗಮಿಸಿರುವುದು ತನಗೆ ಆನಂದಾನುಭೂತಿ ನೀಡುತ್ತಿದೆ ಎಂದರು.

ಮಧ್ವರ ಹೆಸರಿನ ದ್ವಾರ

ಅಯೋಧ್ಯಾ ರಾಮ ಮಂದಿರ ನಿರ್ಮಾಣದಲ್ಲೂ ಉಡುಪಿಯ ಮಂದಿಯ ಕೊಡುಗೆ ಬಹಳಷ್ಟಿದೆ. ಆ ಕಾರಣದಿಂದಲೇ ಅಯೋಧ್ಯೆಯಲ್ಲಿ ಆಚಾರ್ಯ ಮಧ್ವರ ದ್ವಾರ ಸ್ಥಾಪಿಸುವ ಮೂಲಕ ಉಡುಪಿ ಹಾಗೈ ಆಚಾರ್ಯ ಮಧ್ವರಿಗೆ ಗೌರವ ಸಲ್ಲಿಸಲಾಗಿದೆ ಎಂದರು.

ಉಡುಪಿಯ ಸುಶಾಸನ

ರಾಜಕೀಯವಾಗಿಯೂ ಉಡುಪಿಗೆ ವಿಶಿಷ್ಟ ಸ್ಥಾನವಿದ್ದು, ಉಡುಪಿ ಪುರಸಭೆಯಲ್ಲಿ ಜನಸಂಘ ಅಧಿಕಾರಕ್ಕೆ ಬರುವ ಮೂಲಕ ದಕ್ಷಿಣ ಭಾರತದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬರಲು ಶ್ರೀಕಾರ ಮೂಡಿಸಿತು. ಇಂದಿಗೂ ಉಡುಪಿಯ ಮಂದಿ ಬಳಕೆಯನ್ನು ನೆಚ್ಚಿಕೊಂಡಿರುವುದು ಶ್ಲಾಘನೀಯ. ಮಲ ಹೊರುವ ಪದ್ಧತಿ ನಿಷೇಧಿಸಿದ ಕೀರ್ತಿ ಉಡುಪಿ ಪುರಸಭೆಯ ಅಧ್ಯಕ್ಷರಾಗಿದ್ದ ಡಾ.ವಿಎಸ್.ಆಚಾರ್ಯ ಅವರಿಗೆ ಸಲ್ಲುತ್ತದೆ. ಈ ನಿಟ್ಟಿನಲ್ಲಿ ಉಡುಪಿ ತನಗೆ ವಿವಿಧ ಕಾರಣಗಳಿಂದಾಗಿ ನೆಚ್ಚಿನ ಊರು ಎಂದರು.

ಪರ್ಯಾಯ ಪುತ್ತಿಗೆ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ಮತ್ತು ಕಿರಿಯ ಶ್ರೀ ಸುಶ್ರೀಂದ್ರತೀರ್ಥ ಶ್ರೀಪಾದರು, ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್, ಕೇಂದ್ರ ಸಚಿವ ಪ್ರಹ್ಲಾದ ಜೋಷಿ, ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ, ಸಂಸದರಾದ ಬಿ.ವೈ. ರಾಘವೇಂದ್ರ ಮತ್ತು ಕೋಟ ಶ್ರೀನಿವಾಸ ಪೂಜಾರಿ, ಶಾಸಕರಾದ ಯಶಪಾಲ್ ಸುವರ್ಣ, ಸುನಿಲ್ ಕುಮಾರ್, ಗುರ್ಮೆ ಸುರೇಶ ಶೆಟ್ಟಿ, ಕಿರಣ್ ಕೊಡ್ಗಿ ಮತ್ತು ಗುರುರಾಜ್ ಗಂಟಿಹೊಳಿ ಮೊದಲಾದವರಿದ್ದರು.

ಧರ್ಮಸ್ಥಳ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ಸ್ವಾಗತಿಸಿ, ಕಾರ್ಯಕ್ರಮ ಸಂಚಾಲಕ ಬೈಕಾಡಿ ಸುಪ್ರಸಾದ ಶೆಟ್ಟಿ ವಂದಿಸಿದರು. ಡಾ.ಗೋಪಾಲಾಚಾರ್ ಮತ್ತು ಡಾ. ತನ್ಮಯ್ ಗೋಸ್ವಾಮಿ ನಿರೂಪಿಸಿದರು.

ಕನ್ನಡದಲ್ಲಿ ಭಾಷಣ ಆರಂಭ

ಎಲ್ಲರಿಗೂ ನಮಸ್ಕಾರ ಎಂದು ಕನ್ನಡದಲ್ಲಿ ಮಾತು ಆರಂಭಿಸಿದ ಮೋದಿ, ಜೈ ಶ್ರೀಕೃಷ್ಣ ಎಂದು ಮೂರು ಬಾರಿ ಹೇಳಿದರು.

ತನ್ನ ಚಿತ್ರ ಬಿಡಿಸಿದ್ದ ಮಕ್ಕಳಿಂದ ಆ ಚಿತ್ರ ಪಡೆದು ಅವರಿಗೆ ಶುಭಾಶಯ ಪತ್ರ ಕಳಿಸುವುದಾಗಿ ತಿಳಿಸಿದರು.

ಮೋದಿ ಭಾಷಣದುದ್ದಕ್ಕೂ ಮೋದಿ ಮೋದಿ ಜೈಕಾರ ಹಾಗೂ ಜೈ ಶ್ರೀರಾಮ್ ಘೋಷಣೆ ಹಾಗೂ ಕರತಾಡನ ಸಭೆಯಿಂದ ವ್ಯಕ್ತವಾಯಿತು.

ನವ ಭಾರತ ನಿರ್ಮಾಣಕ್ಕೆ ನವಸಂಕಲ್ಪ

ಸದೃಢ ನವ ಭಾರತ ನಿರ್ಮಾಣಕ್ಕಾಗಿ ಸಮಸ್ತ ಭಾರತೀಯರೂ ನವ ಸಂಕಲ್ಪ ತೊಡುವಂತೆ ಪ್ರಧಾನಿ ಮೋದಿ ಕರೆ ನೀಡಿದರು.

1. ನೀರು ಮತ್ತು ನದಿ ಸಂರಕ್ಷಣೆ

2. ತಮ್ಮ ತಾಯಿ ಹೆಸರಿನಲ್ಲಿ ಗಿಡ ನೆಟ್ಟು ಪೋಷಣೆ

3. ಪ್ರತಿಯೋರ್ವರೂ ಓರ್ವ ಬಡವನಿಗೆ ನೆರವು

4. ಸ್ವದೇಶಿ ಚಿಂತನೆ ಮೈಗೂಡಿಸಿಕೊಳ್ಳುವ ಮೂಲಕ ಆತ್ಮನಿರ್ಭರ ಸಾಕಾರ

5. ಆರೋಗ್ಯಕರ ಸಮತೋಲಿತ ಆಹಾರ ಸೇವನೆ

6. ಸಾವಯವ ಕೃಷಿಗೆ ಆದ್ಯತೆ