ಲಕ್ಷಕಂಠ ಗೀತಾ ಪಾರಾಯಣ ವಿಶ್ವ ದಾಖಲೆ

ಲೋಕಬಂಧು ನ್ಯೂಸ್, ಉಡುಪಿ

ಪುತ್ತಿಗೆ ಮಠಾಧೀಶ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರ ವಿಶ್ವ ಗೀತಾ ಚತುರ್ಥ ಪರ್ಯಾಯ ಸಂದರ್ಭದ ಗೀತೋತ್ಸವದಲ್ಲಿ ನ.28ರಂದು ಶುಕ್ರವಾರ ನಡೆದ ಲಕ್ಷ‌ಕಂಠ ಗೀತಾ ಪಾರಾಯಣ ವಿಶ್ವ ದಾಖಲೆ ಮಾಡಿದ್ದು, ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್'ಗೆ ಸೇರ್ಪಡೆಗೊಂಡಿದೆ.

ಲಕ್ಷಕಂಠ ಗೀತಾ ಪಾರಾಯಣದಲ್ಲಿ 15ನೇ ಅಧ್ಯಾಯ ಪಾರಾಯಣ ವಿಶೇಷವಾಗಿತ್ತು. ಹಾಗಾಗಿ ಅದನ್ನೇ ಪರಿಗಣಿಸಿ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ಪ್ರಮಾಣ ಪತ್ರವನ್ನು ಪರ್ಯಾಯ ಪುತ್ತಿಗೆ ಮಠಾಧೀಶ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರಿಗೆ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್‌ ಏಷಿಯಾ ಹೆಡ್ ಡಾ.ಮನೀಶ್ ವಿಷ್ಣೋ ಹಸ್ತಾಂತರಿಸಿದರು.

ಭಗವದ್ಗೀತೆಯ ಸಾಮೂಹಿಕ ಪಠನ ಈಗಾಗಲೇ ಅನೇಕ ಕಡೆಗಳಲ್ಲಿ ಆಗಿದೆ. ಬಹುತೇಕ ಕಡೆಗಳಲ್ಲಿ ಒಂದು ಅಥವಾ ಕೆಲವು ಅಧ್ಯಾಯದ ಪಠನ ಮಾತ್ರ ನಡೆದಿದೆ. 18 ಅಧ್ಯಾಯ ಪಠನದ ಜೊತೆಗೆ ವಿಶೇಷವಾಗಿ 15ನೇ ಅಧ್ಯಾಯದ ಪಠನ ಸಾಮೂಹಿಕವಾಗಿ ಆಗಿರುವುದನ್ನು ಪರಿಗಣಿಸಿ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ಪ್ರಮಾಣಪತ್ರ ನೀಡಿದ್ದೇವೆ ಎಂದು ಡಾ.ಮನೀಶ್ ವಿಷ್ಣೋ ಮಾಹಿತಿ ನೀಡಿದರು.