ನಮೋ `ಭಾರತ ಭಾಗ್ಯವಿದಾತ'

ಲೋಕಬಂಧು ನ್ಯೂಸ್, ಉಡುಪಿ

ಶ್ರೀಕೃಷ್ಣ ಬೋಧಿತ ಭಗವದ್ಗೀತೆಯ ಸಂದೇಶವನ್ನು ನಿತ್ಯ ಜೀವನದಲ್ಲಿ ಅನುಸರಿಸಿ, ಅದನ್ನು ಆಡಳಿತದಲ್ಲೂ ಅಳವಡಿಸಿಕೊಳ್ಳುವ ಮೂಲಕ ಸರ್ವರ ಏಳಿಗೆಯ ಆಶಯ ಇರಿಸಿಕೊಂಡಿರುವ ಪ್ರಧಾನಿ ನರೇಂದ್ರ ಮೋದಿ ಅರ್ಜುನನಂತಿದ್ದಾರೆ. ಗೀತೆ ಇದ್ದಲ್ಲಿ ಅರ್ಜುನ ಇರಲೇಬೇಕು. ಈ ನಿಟ್ಟಿನಲ್ಲಿ ಗೀತೆಯ ಸಮರ್ಪಣೆಯ ಪರ್ವಕಾಲದಲ್ಲಿ ಗೀತಾ ಬೋಧಕ ಕೃಷ್ಣ ಸನ್ನಿಧಾನಕ್ಕೆ ಮೋದಿ ಆಗಮಿಸಿರುವುದು ಸಂತಸದ ಸಂಗತಿ. ಮೋದಿ ಅವರ ಧರ್ಮ- ರಾಜಕಾರಣದ ಮಹಾನ್ ಕಾರ್ಯ ಪರಿಗಣಿಸಿ ಅವರಿಗೆ ಭಾರತ ಭಾಗ್ಯವಿದಾತ ಉಪಾದಿ ನೀಡುವುದಾಗಿ ಪರ್ಯಾಯ ಪುತ್ತಿಗೆ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ಪ್ರಕಟಿಸಿದರು.

ಪರ್ಯಾಯ ಪುತ್ತಿಗೆ ಮಠ ವತಿಯಿಂದ ಕೃಷ್ಣ ಮಠದಲ್ಲಿ ನಡೆಯುತ್ತಿರುವ ಗೀತೋತ್ಸವ ಅಂಗವಾಗಿ ಶುಕ್ರವಾರ ಆಯೋಜಿಸಲಾದ ಲಕ್ಷಕಂಠ ಗೀತಾ ಪಾರಾಯಣ ಕಾರ್ಯಕ್ರಮದಲ್ಲಿ ಸಾನ್ನಿಧ್ಯ ವಹಿಸಿ ಮೋದಿ ಅವರಿಗೆ ಪದವಿ ಪ್ರದಾನಮಾಡಿದರು.

ನವಿಲುಗರಿಯುಳ್ಳ ಮುತ್ತಿನ ಪೇಟ, ಬೆಳ್ಳಿ ಕಡೆಗೋಲು

ನವಿಲುಗರಿಯುಕ್ತವಾದ ಮುತ್ತಿನ ಪೇಟ, ಶ್ರೀಕೃಷ್ಣ ಲಾಂಛನವುಳ್ಳ ತುಳಸಿ ಮಣಿಯುಕ್ತ ಚಿನ್ನದ ಬ್ರಾಸ್ಲೆಟ್, ಬೆಳ್ಳಿಯ ಬೃಹತ್ ಕಡೆಗೋಲು, ಕೃಷ್ಣನ ಭಾವಚಿತ್ರ ಹಾಗೂ ರಜತ ಫಲಕಗಳನ್ನು ಶ್ರೀಪಾದರು ನೀಡಿ ಮೋದಿ ಅವರನ್ನು ಗೌರವಿಸಿದರು.

ಸಂಸ್ಕೃತ ಗೀತಾಭಾಷೆ

ಸಂಸ್ಕೃತ ದೇವಭಾಷೆ. ಗೀತೆ ಇರುವುದು ಸಂಸ್ಕೃತದಲ್ಲಿ. ಹಾಗಾಗಿ ಅದು ಗೀತಾ ಭಾಷೆ. ಸಂಸ್ಕೃತ, ಸಂಸ್ಕೃತಿಯ ಪುನರುತ್ಥಾನದಿಂದ ದೇಶದ ಪ್ರಗತಿ ಸಾಧ್ಯ ಎಂದ ಶ್ರೀಪಾದರು, ಪ್ರಧಾನಿಯಾಗಿ ಉಡುಪಿಗೆ ಮೊದಲ ಭೇಟಿ ನೀಡುತ್ತಿರುವ ಈ ಸಂದರ್ಭದಲ್ಲಿ ಅಯೋಧ್ಯೆ ಶ್ರೀರಾಮ ಮಂದಿರ ಸ್ಥಾಪನೆ ಹಾಗೂ ಧರ್ಮಧ್ವಜ ಪ್ರತಿಷ್ಠೆಯ ಬಳಿಕ ಉಡುಪಿಗೆ ಬಂದಿರುವುದು ಸಂತಸದಾಯಕ.

ರಾಷ್ಟ್ರರಕ್ಷಾ ಕಂಕಣ

ರಾಷ್ಟ್ರ ರಕ್ಷಣೆ ಹಾಗೂ ಸಜ್ಜನರ ಸಂರಕ್ಷಣೆ ದುಷ್ಟರಿಗೆ ಶಿಕ್ಷೆ ನೀಡುವ ಶಕ್ತಿಯನ್ನು ಕೃಷ್ಣ ಪರಮಾತ್ಮ ಪ್ರಧಾನಿ ಮೋದಿ ಅವರಿಗೆ ನೀಡಲಿ ಎಂದು ಹಾರೈಸಿ ಪುತ್ತಿಗೆ ಶ್ರೀಗಳು ಪ್ರಧಾನಿ ಮೋದಿಗೆ ರಾಷ್ಟ್ರರಕ್ಷೆ ತೊಡಿಸಿದರು.

ಮೋದಿಯಿಂದ ದೇಶ ಸುರಕ್ಷೆ

`ಇಂದ್ರ' ಪರಂಪರೆಯ ಪುತ್ತಿಗೆ ಮಠ ಪರ್ಯಾಯ ಅವಧಿಯಲ್ಲಿಯೇ ಉಡುಪಿಗೆ ಆಗಮಿಸಿರುವುದನ್ನು ಸ್ಮರಿಸಿದ ಶ್ರೀಗಳು, ಧರ್ಮ ರಕ್ಷಿಸಿದಲ್ಲಿ ಧರ್ಮವೇ ನಮ್ಮನ್ನು ರಕ್ಷಿಸುತ್ತದೆ ಎಂಬ ಮಾತಿನಂತೆ ಜಗತ್ತಿನ ಎಲ್ಲ ಧರ್ಮಗಳ ರಕ್ಷಣೆಗೆ ಮೋದಿ ಅನಿವಾರ್ಯ ಎಂದರು.

ಇನ್ನಷ್ಟು ಶಕ್ತಿ

ಸನ್ಮಾನ ಸ್ವೀಕರಿಸಿದ ಪ್ರಧಾನಿ ನರೇಂದ್ರ ಮೋದಿ, ಶ್ರೀಗಳ ಆಶೀರ್ವಾದದಿಂದ ಕಾರ್ಯನಿರ್ವಹಣೆಗೆ ತನಗೆ ಇನ್ನಷ್ಟು ಶಕ್ತಿ ಮತ್ತು ಹುರುಪು ಲಭಿಸಲಿ ಎಂದು ಆಶಿಸಿದರು.

ಪುತ್ತಿಗೆ ಕಿರಿಯ ಶ್ರೀ ಸುಶ್ರೀಂದ್ರತೀರ್ಥ ಶ್ರೀಪಾದರು, ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್, ಕೇಂದ್ರ ಸಚಿವ ಪ್ರಹ್ಲಾದ ಜೋಷಿ, ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ, ಸಂಸದರಾದ ಬಿ.ವೈ. ರಾಘವೇಂದ್ರ ಮತ್ತು ಕೋಟ ಶ್ರೀನಿವಾಸ ಪೂಜಾರಿ, ಶಾಸಕರಾದ ಯಶಪಾಲ್ ಸುವರ್ಣ, ಸುನಿಲ್ ಕುಮಾರ್, ಗುರ್ಮೆ ಸುರೇಶ ಶೆಟ್ಟಿ, ಕಿರಣ್ ಕೊಡ್ಗಿ ಮತ್ತು ಗುರುರಾಜ್ ಗಂಟಿಹೊಳಿ ಮೊದಲಾದವರಿದ್ದರು.

ಧರ್ಮಸ್ಥಳ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆ ಸ್ವಾಗತಿಸಿ, ಕಾರ್ಯಕ್ರಮ ಸಂಚಾಲಕ ಬೈಕಾಡಿ ಸುಪ್ರಸಾದ ಶೆಟ್ಟಿ ವಂದಿಸಿದರು. ಡಾ.ಗೋಪಾಲಾಚಾರ್ ಮತ್ತು ಡಾ. ತನ್ಮಯ ಗೋಸ್ವಾಮಿ ನಿರೂಪಿಸಿದರು. ಮಠದ ದಿವಾನ ನಾಗರಾಜ ಆಚಾರ್ಯ, ಕಾರ್ಯದರ್ಶಿ ಪ್ರಸನ್ನ ಆಚಾರ್ಯ, ಶ್ರೀಗಳ ಆಪ್ತ ಕಾರ್ಯದರ್ಶಿ ರತೀಶ ತಂತ್ರಿ ಇದ್ದರು.

ಕಾರ್ಯಕ್ರಮದಲ್ಲಿ ಮಂಗಳೂರು ಸಂಸದ ಬೃಜೇಶ್ ಚೌಟ, ವಿಧಾನ ಪರಿಷತ್ ಸದಸ್ಯ ಡಾ. ಧನಂಜಯ ಸರ್ಜಿ, ಬಿಜೆಪಿ ಮಂಗಳೂರು ವಿಭಾಗ ಪ್ರಭಾರಿ ಉದಯಕುಮಾರ್ ಶೆಟ್ಟಿ, ಮಾಜಿ ಶಾಸಕ ಲಾಲಾಜಿ ಮೆಂಡನ್, ಪಕ್ಷ ಪ್ರಮುಖರಾದ ಕುಯಿಲಾಡಿ ಸುರೇಶ ನಾಯಕ್, ಶ್ರೀನಿಧಿ ಹೆಗ್ಡೆ, ದ.ಕ. ಕಸಾಪ ಮಾಜಿ ಅಧ್ಯಕ್ಷ ಪ್ರದೀಪಕುಮಾರ್ ಕಲ್ಕೂರ ಮೊದಲಾದವರಿದ್ದರು.