ಪ್ರಧಾನಿ ಮೋದಿಯಿಂದ ಕನಕ- ಕೃಷ್ಣ ದರ್ಶನ

ಲೋಕಬಂಧು ನ್ಯೂಸ್, ಉಡುಪಿ

ಪ್ರಧಾನಮಂತ್ರಿ ನರೇಂದ್ರ ಮೋದಿ ಕನಕದಾಸರು ಮತ್ತು ಕೃಷ್ಣ ದರ್ಶನ ಮಾಡಿದರು.

ಪೂರ್ಣಕುಂಭ ಸ್ವಾಗತ

ಪ್ರಧಾನಿಯಾದ ಬಳಿಕ ಉಡುಪಿಗೆ ಪ್ರಥಮ ಭೇಟಿ ನೀಡಿದ ನರೇಂದ್ರ ಮೋದಿ ಅವರಿಗೆ ಶುಕ್ರವಾರ ಕೃಷ್ಣ ಮಠದಲ್ಲಿ ಪೂರ್ಣಕುಂಭ ಸ್ವಾಗತ ನೀಡಲಾಯಿತು.

ಕನಕದ ಕವಚ ಉದ್ಘಾಟನೆ

ಆದಿವುಡುಪಿಯಿಂದ ಕೃಷ್ಣಮಠಕ್ಕೆ ಆಗಮಿಸಿದ ಮೋದಿ ಅವರು ಕನಕನ ಗುಡಿಗೆ ತೆರಳಿ ಕನಕದಾಸರ ವಿಗ್ರಹಕ್ಕೆ ಪುಷ್ಪಾರ್ಚನೆ ಮಾಡಿದರು. ಬಳಿಕ ಕನಕನ ಕಿಂಡಿಯ ಕನಕದ ಕವಚ ಉದ್ಘಾಟಿಸಿ, ಕೃಷ್ಣಮಠ ಪ್ರವೇಶಿಸಿದರು.

ಆಗ ಸುವರ್ಣ ಬಿಂದಿಗೆಯಲ್ಲಿ ಪೂರ್ಣಕುಂಭ ಸ್ವಾಗತ ನೀಡಲಾಗಿದ್ದು ಮಂತ್ರಘೋಷ, ಸಾಂಪ್ರದಾಯಿಕ ವಾದ್ಯ ಮೊಳಗಿಸಲಾಯಿತು. ಪರ್ಯಾಯ ಪುತ್ತಿಗೆ ಮಠಾಧೀಶ ಶ್ರೀ ಸುಗುಣೇಂದ್ರತೀರ್ಥರು ಮತ್ತು ಕಿರಿಯ ಶ್ರೀ ಸುಶ್ರೀಂದ್ರತೀರ್ಥರು ಇದ್ದರು.

ಸುವರ್ಣ ತೀರ್ಥ ಮಂಟಪ ಉದ್ಘಾಟನೆ

ಶ್ರೀಕೃಷ್ಣ ಮುಖ್ಯಪ್ರಾಣ ದರ್ಶನದ ಬಳಿಕ ಸುವರ್ಣ ತೀರ್ಥ ಮಂಟಪ ಉದ್ಘಾಟಿಸಿದರು. ಪುತ್ತಿಗೆ ಶ್ರೀಗಳು ಮೋದಿ ಅವರಿಗೆ ಕೃಷ್ಣ ಪ್ರಸಾದ ನೀಡಿದರು.

ಗೀತಾ ಲೇಖನ ದೀಕ್ಷೆ

ಕೃಷ್ಣ ಸಮ್ಮುಖದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಕೋಟಿ ಗೀತಾ ಲೇಖನಯಜ್ಞ ದೀಕ್ಷೆ ಪಡೆದರು.

ಪರ್ಯಾಯ ಪುತ್ತಿಗೆ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರಿಗೆ ವೈಷ್ಣವರು ಧರಿಸುವ ಅಂಗಾರಕ ಅಕ್ಷತೆಯ ತಿಲಕವಿಟ್ಟು, ಶ್ರೀಕೃಷ್ಣನಿಗೆ ತೊಡಿಸಿದ ರಜತ ತುಳಸಿ ಮಣಿಮಾಲೆ, ವಿಷ್ಣುಲಾಂಛನಯುಕ್ತ ಪಂಚಮುದ್ರೆಗಳು ಹಾಗೂ ಗೋಪಿಚಂದನಗಳನ್ನು ಕೊಡುಗೆಯಾಗಿ ನೀಡಿದರು.

ಬಳಿಕ ಗೀತಾ ಮಂದಿರಕ್ಕೆ ತೆರಳಿ, ಗೀತಾ ಮಂದಿರದಲ್ಲಿ ನಿರ್ಮಿಸಲಾದ ಶ್ರೀ ಅನಂತಪದ್ಮನಾಭ ದರ್ಶನ ಮಾಡಿದರು. ಗೀತಾ ಮಂದಿರ ವೀಕ್ಷಿಸಿದರು.

ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್, ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ, ಶ್ರೀಮಠದ ದಿವಾನ ನಾಗರಾಜ ಆಚಾರ್ಯ, ಕಾರ್ಯದರ್ಶಿ ಪ್ರಸನ್ನ ಆಚಾರ್ಯ ಇದ್ದರು.

ಯತಿಗಳ ಭೇಟಿ

ಕೃಷ್ಣಮಠದ ಚಂದ್ರಶಾಲೆಯಲ್ಲಿ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಪರ್ಯಾಯ ಪುತ್ತಿಗೆ ಉಭಯ ಶ್ರೀಪಾದರ ಜೊತೆಗೆ ಪೇಜಾವರ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದರು, ಭಾವಿ ಪರ್ಯಾಯ ಶೀರೂರು ಶ್ರೀ ವೇದವರ್ಧನತೀರ್ಥ ಶ್ರೀಪಾದರು ಹಾಗೂ ಸುಬ್ರಹ್ಮಣ್ಯ ಮಠದ ಶ್ರೀ ವಿದ್ಯಾಪ್ರಸನ್ನತೀರ್ಥ ಶ್ರೀಪಾದರನ್ನು ಭೇಟಿ ಮಾಡಿ ಆಶೀರ್ವಾದ ಪಡೆದರು.