ಇಂದ್ರಾಣಿ ಶ್ರೀ ನಾಗದೇವರ ಗುಡಿಯಲ್ಲಿ ಪುನಃಪ್ರತಿಷ್ಠೆ

ಲೋಕಬಂಧು ನ್ಯೂಸ್ | ಉಡುಪಿ, ಏ.7

ಇಂದ್ರಾಣಿ ಶ್ರೀಮುಖ್ಯಪ್ರಾಣ ಗುಡಿಯ ಪುಷ್ಕರಿಣಿ ಬಳಿಯ ಶ್ರೀ ನಾಗದೇವರ ಗುಡಿಯಲ್ಲಿ ಮಂಗಳವಾರ ಶ್ರೀ ನಾಗದೇವರ ಪುನಃಪ್ರತಿಷ್ಠೆ ನಡೆಯಿತು.

ಶ್ರೀ ದೇವಳದ ತಂತ್ರಿ ಪುತ್ತೂರು ಶ್ರೀನಿವಾಸ ತಂತ್ರಿ ನೇತೃತ್ವದಲ್ಲಿ ಬ್ರಹ್ಮಕಲಶಾಭಿಷೇಕ ನಡೆಸಲಾಯಿತು.

ಅದಕ್ಕೂ ಪೂರ್ವದಲ್ಲಿ ಶುದ್ಧ ಸಂಪ್ರೋಕ್ಷಣೆ, ವಾಸ್ತುರಕ್ಷಾ ಹೋಮ, ವಾಸ್ತುಬಲಿ, ಬಿಂಬಾಧಿವಾಸ ಇತ್ಯಾದಿ ಧಾರ್ಮಿಕ ಪ್ರಕ್ರಿಯೆಗಳು ನಡೆದವು.

ಪ್ರತಿಷ್ಠಾ ಹೋಮದ ಬಳಿಕ ಬೆಳಿಗ್ಗೆ 9.03ಕ್ಕೆ ಶ್ರೀ ನಾಗದೇವರ ಪುನಃಪ್ರತಿಷ್ಠೆ, ಪ್ರಧಾನ ಹೋಮ, ಸರ್ಪತ್ರಯ ಹೋಮ, ಕೂಷ್ಮಾಂಡ ಹೋಮ ಬಳಿಕ ಆಶ್ಲೇಷಾ ಬಲಿ, 49 ಕಲಶಾರಾಧನೆ, ಪಂಚಾಮೃತ ಕಲಶಾಭಿಷೇಕ, ಮಹಾಪೂಜೆ, ವಟು ಆರಾಧನೆ, ಅನ್ನಸಂತರ್ಪಣೆ ಹಾಗೂ ಪ್ರಸಾದ ವಿತರಣೆ ನಡೆಯಿತು.

ಇಂದ್ರಾಣಿ ಶ್ರೀಮುಖ್ಯಪ್ರಾಣ ಮತ್ತು ಶ್ರೀನಾಗದೇವರ ಬ್ರಹ್ಮಕಲಶೋತ್ಸವ ಸಮಿತಿ ಅಧ್ಯಕ್ಷ ಬಿ.ಜಯಕರ ಶೆಟ್ಟಿ ಇಂದ್ರಾಳಿ, ಜೀರ್ಣೋದ್ಧಾರ ಸಮಿತಿ ಅಧ್ಯಕ್ಷ ಭೂಪತಿ ಶೆಟ್ಟಿ, ಇಂದ್ರಾಣಿ ಪಂಚದುರ್ಗಾಪರಮೇಶ್ವರಿ ದೇವಳ ಆಡಳಿತ ಸಮಿತಿ ಅಧ್ಯಕ್ಷ ಕುಶಲ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ರತ್ನಾಕರ ಇಂದ್ರಾಳಿ, ಸಮಿತಿ ಸದಸ್ಯರು ಮೊದಲಾದವರಿದ್ದರು.