ಕೃಷ್ಣಮಠಕ್ಕೆ ಉತ್ತರಾದಿಮಠ ಸ್ವಾಮೀಜಿ ಭೇಟಿ

ಲೋಕಬಂಧು ನ್ಯೂಸ್ ಉಡುಪಿ, ಏ.26

ಶೀರೂರು ಮಠಾಧೀಶ ಶ್ರೀ ವೇದವರ್ಧನತೀರ್ಥ ಶ್ರೀಪಾದರ ಪ್ರಥಮ ಪರ್ಯಾಯ ಸಂದರ್ಭದಲ್ಲಿ ಉತ್ತರಾದಿ ಮಠದ ಶ್ರೀ ಸತ್ಯಾತ್ಮತೀರ್ಥ ಶ್ರೀಪಾದರು ಭಾನುವಾರ ಇಲ್ಲಿನ ಶ್ರೀಕೃಷ್ಣ ಮಠಕ್ಕೆ ಭೇಟಿ ನೀಡಿದರು.

ಪಟ್ಟದ ದೇವರಾದ ಶ್ರೀ ಮೂಲರಾಮ ದೇವರ ಸಮೇತ ಆಗಮಿಸಿದ ಶ್ರೀಪಾದರನ್ನು ಮೆರವಣಿಗೆ ಮೂಲಕ ಪರ್ಯಾಯ ಶೀರೂರು ಮಠದ ವತಿಯಿಂದ ಸಂಸ್ಕೃತ ಕಾಲೇಜಿನಿಂದ ಸ್ವಾಗತಿಸಲಾಯಿತು.

ಶ್ರೀಪಾದರು ಕನಕನ ಕಿಂಡಿ‌ ಮೂಲಕ ದೇವರ ದರ್ಶನ ಮಾಡಿದರು.

ಕೃಷ್ಣ ಮಠದ ಮುಂಭಾಗದಲ್ಲಿ ಪರ್ಯಾಯ ಪೀಠಾಧೀಶ ಶ್ರೀ ವೇದವರ್ಧನತೀರ್ಥ ಶ್ರೀಪಾದರು ಉತ್ತರಾದಿ ಮಠದ ಶ್ರೀ ಸತ್ಯಾತ್ಮತೀರ್ಥ ಶ್ರೀಪಾದರನ್ನು ಬರಮಾಡಿಕೊಂಡು, ಕನಕ ನವಗ್ರಹ ಕಿಂಡಿ ಮೂಲಕ‌ ಶ್ರೀಕೃಷ್ಣ ದರ್ಶನ ಮಾಡಿಸಿದರು.

ಈ ಸಂದರ್ಭದಲ್ಲಿ ಶೀರೂರು ಮಠದ ದಿವಾನ ಡಾ.ಉದಯ ಕುಮಾರ್ ಸರಳತ್ತಾಯ, ಪಾರುಪತ್ಯೆಗಾರ ಶ್ರೀಶ ಭಟ್ ಕಡೆಕಾರು ಉಪಸ್ಥಿತರಿದ್ದರು.